幫馬刺破塞激得滯？ Manu打爆鞋！

打波打到爆鞋你見過未？周三NBA常規賽馬刺主場迎戰活塞，喺有主將之一尼納特傷癒復出下，以120:110贏波。老將真路比利（Manu）喺第2節防守嘅時候出事，左腳一嘢撐爆咗隻波鞋，隨即宣告total loss。𠵱家啲波鞋講求高科技，之不過喺耐用程度方面似乎仲爭啲喎。
真路比利喺今仗入咗16分以及貢獻9次助攻，絕對係馬刺陣中表現最好嘅球員之一。呢位36歲老將防守上都好落力，去到第2節完場前，佢防守緊活塞控衞史塔基，向後退左腳落地嘅時候似乎衝力太大，佢隻波鞋左邊徹底裂開，成隻左腳穿咗出去。教練普波域治見到咁嘅情況即刻叫暫停，再叫工作人員去更衣室拎對新鞋畀真路比利換。

[img]http://static.apple.nextmedia.com/images/apple-photos/apple/20140228/large/28s8-177p.jpg[/img]
■賽後有網民上載相片，展示Manu隻鞋爛得幾犀利。互聯網


「打咁耐波首次發生」
雖然呢單嘢奇怪得嚟又有啲搞笑，不過對真路比利嚟講都唔講得笑，咁樣插隻腳出嚟隨時會傷及腳踭，好在最後都冇乜事。至於到底佢係着邊對鞋咁化學？睇落應該係「一剔牌」嘅 Air Max Closer V啦；不過佢都好識做，喺賽後冇批評呢個合作咗好耐嘅贊助商：「爛鞋係今場波嘅焦點？其實我都唔知發生乜嘢事，當時想煞停點知出事，我打咁耐波都係第一次發生啲咁嘅事，好奇怪但冇乜大不了。」有小道消息話真路比利會喺之後比賽，會改着曾俾占士嫌棄嘅LeBron11。而邦拿賽後亦自爆之前着「新平衡」打到甩鞋底，所以嗱嗱聲轉贊助。

格蘭加上艇機會高
馬刺主力控衞柏加喺今場波繼續養傷，不過似乎影響有限，今仗全隊總共造出34次助攻，平咗球隊今季新高。其他傷兵情況基本上已經好得七七八八，缺陣咗14場嘅小前鋒尼納特，上陣29分鐘入咗15分，表現唔錯。
另外，上星期76人同溜馬做球員轉會交易羅致到前鋒格蘭加，據報76人已經買斷咗後者嘅合約。話晒格蘭加喺巔𥧌狀態嗰陣，一季平均每場可以拎到25分，回復自由身之後佢希望可以加盟一支有力爭標嘅球隊，據講馬刺、快艇同熱火都想簽到佢。有報道指快艇暫時機會最大，已經派人同格蘭加嘅代表傾條件；快艇喺周三常規賽同樣贏波，喺主場以101:93擊敗火箭，佢哋已經「執」咗格連戴維斯，如果簽埋格蘭加，爭總冠軍嘅本錢相信會提高唔少。

[img]http://static.apple.nextmedia.com/images/apple-photos/apple/20140228/large/28s8-101p.jpg[/img]
■真路比利（白衫）打波打到爆鞋，聞所未聞。美聯社


[img]http://static.apple.nextmedia.com/images/apple-photos/apple/20140228/large/aa0801c.gif[/img]


來源:蘋果日報網站